Feiersalamander
Salamandra salamandra
Foto: Alexandra Arendt
Erkennen!
De Feiersalamander ka bis zu 14-20 cm laang ginn. D'Uewersäit vu sengem Kierper ass schwaarz-giel gesträift, d'Ënnersäit ass gro, schwaarz oder brongelzeg a verwäsch giel gefleckt. Dat giel-schwaarzt Faarwemuster deng als Warnsignal. An deene villen Hautdrüsen gëtt e gëftegt Sekret gebilt: e wierksame Schutz viru Friessfeinden.
Am Ënnerscheed zu de Molchen ass dem Feiersalamander säi Schwanz ronn an net säitlech zesumme gedréckt.
De Feiersalamander lieft am léifsten an fiichte Lafbëscher mat Quellbaachen.
Wousst der schon?
Wéi d'Molchen an d'Fräsche gehéiert de Feiersalamander zu den Amphibien. Bei der Fortplanzung ënnerscheet hien sech allerdéngs vun allen aneren eenheemeschen Amphibien. D'Paarung ass u Land an net am Waasser. Ausserdeem gi keng Eeër an d'Waasser ofgeluecht wéi bei de Molchen an de Fräschen, ma eréischt ronn 10 Méint no der Paarung setzt d'Weibchen 20-40 wäit entwéckelt Larven an d'Waasser of. Dës Kauzekäpp ootme fir d'éischt nach duerch Kiemen. No 3-4 Méint verloossen déi ongeféier 6 cm laang jonk Salamanderen, déi elo mat Longen ootmen, d'Waasser a liewen u Land. D'Déiere ginn eréischt mat 3-6 Joer geschlechtsräif.
De Feiersalamander ass nuets aktiv, dagsiwwer verstoppt hien sech op killen a fiichte Plazen, wéi ënnert doudegem Holz, Blieder, Mooss a Steng, a vermuuschte Bamstämm, Buedemlächer, Fielssplécken, …
Well et zu Lëtzebuerg nach vill Lafbëscher gëtt, ass de Feiersalamander
nach wäit verbreet. E steet wéi all eenheemesch Amphibienarten zu
Lëtzebuerg ënner Naturschutz.
