Méi gewuer gin

Dateportal

Am Summer 2003 huet ee Wëssenschaftler vum Musée d’Gottesanbeterin fir d’éischte Kéier zu Lëtzebuerg entdeckt. Dës typesch mediterran Aart ass zanterhier och op anere Platzen hei zu Lëtzebuerg gesi ginn. Dës Beobachtungen an d‘Beobachtunge vun aneren Aarten hei zu Lëtzebuerg ginn an eng Datebank agedroen déi et erméiglecht d'Ausbreedung vun Aarten ze studéieren oder awer de Réckgang vu bedrohten Aarte festzestelle fir se besser kennen ze schützen. Dem Musée seng Biodiversitéitsdatebank enthält iwwer 1,7 Millioune Feldbeobachtunge vun Déiren a Planzenaarten an iwwert 100.000 Donnéeën vun de Spezimen aus senge Sammlungen (Planzen, Déieren, Fossilien a Mineraler). Trotz der beandrockender Zuel un Donnéeën ass d’Bestandsopnam vun der Biodiversitéit zu Lëtzebuerg awer nach laang net komplett.

Wéi matmaachen?

De Musée huet Aktiounen op sengem Dateportal lancéiert fir d’Bierger opzefuerderen sech um Inventaire vun der Biodiversitéit ze bedeelegen andeem si hir Beobachtunge vun Aarten déi invasiv sinn oder déi amgaange sinn zeréck ze goen an der Datebank vum Musée ofzespäicheren. Déi méi erfueren Naturaliste kennen hir Beobachtungen a spezielle Masken déi op déi verschidden Aartegruppen zougeschneidert sinn androen.

Firwat sinn des Donnée gutt?

D’Daten déi Dir iwwert den Internet op eisem Portal androt gi vun Experten nogekuckt éier se an d’Biodiversitéitsdatebank vum Musée geluede ginn. Dank dësen Donnéeën kenne mir d’Verbreedung vun den Aarte studéieren a bestëmmen op eng Aart amgaangen ass zréck ze goen. Des Donnéeën hëllefen dann och fir Naturschutzgebidder festzeleeën a bei der Landesplanung.

Zougang zu den Daten

Dir kennt iech d’Biodiversitéitsdaten zu Lëtzebuerg op eisem Biodiversitéits-Kaarteportal ukucken map.mnhn.lu. Mir verëffentlechen och e groussen Deel vun den Donnéeën um Weltportal vun der Biodiversitéit: www.gbif.org (Global Biodiversity Information facility - GBIF) an och um Groussregiounsportal dat d’Verbreedung vun europawäit geschützten Aarten an der Groussregioun uweist.